尋日睇咗一日新聞，頂唔順，餵奶之前出去跑個步當抖下氣，兼且分散下注意力。
喺籃球場未開番之下，跑步成為咗我嘅惟一運動。有睇我story嘅朋友，可能都會留意到我嗰個 #亂世之中保持強健體魄 系列最近全部都係跑步嚟；專業講唔上，但係跑得勤咗，就多多少少會有啲用家心得。今次想由以用家角度出發，講下我最近著嘅練習鞋 - Nike Air Zoom Pegasus 37。
Pegasus係Nike跑步家族嘅元老，「37」就當然代表呢隻小飛馬問世37年啦。我自己由31開始「上馬」，叫做睇住呢幾年嚟佢嘅革新同升級。等我用遊戲機做個比喻：有打開機嘅朋友應該會明白，有時有啲主機或者軟件升級，小修小改，好咗喺邊度有時連資深玩家都察覺唔到；但若果係科技上嘅超級大進步，例如畫面突然靚咗好多之類呢，咁就連平時唔打機嘅人都會識得講：嘩，乜而家啲遊戲機畫面咁真㗎？
我夠膽講，由Pegasus 36去到而家呢對37，就係嗰種由PS2上PS3嘅超大進步。(PS3上PS4反而冇咁significant)
跑步鞋嚟講，我睇前掌觸地感睇得最重。Pegasus 37嘅前掌Zoom Air厚度係36嘅兩倍；回彈力加強，腳掌落地嗰種舒適感非常之明顯，基本上一試就感覺到個分別；Air厚咗，但係前掌厚度並冇明顯增加，唔會影響反應同敏感度。我唔多跑track，跑開條路間唔中有啲凹凸；敏感度越夠，避過受傷嘅機會就越大。
近年跑鞋大勢由薄轉厚，Pegasus 37嘅中底亦都比上一代稍稍厚咗啲，相信係因為有全掌React泡棉。React嘅存在主要係用嚟加強保護同緩衝；另外鞋面物料亦都比上一代輕同透氣。其實仲有一樣唔太技術性而又好重要嘅嘢，就係上一代用嗰隻尼龍鞋帶好難綁得實，勁易甩，37改善埋，實在太好。
重覆一次，以上係一個超業餘跑步愛好者嘅意見，目的係唔想大家錯過一對好嘅鞋；另外亦都想做下期望控制：記住，Pegasus 37嘅position係一對日用嘅全面練習鞋，唔好諗住係新鞋就會有頂級比賽鞋嘅速度感。總括嚟講，佢每方面都畀到啲你，不過唔會畀多，但係用嚟日常練習一定夠用。試過之後你就會明白，呢對鞋絕對對得住$899嘅售價有餘，性價比勁高。基本上買37就同你加入天文學會一樣，係包你唔會後悔嘅。無慮入手啦。
#Pegasus37
#PlayForTheWorld
#NikeRunning
Search